१७ वर्षपछि रामकृष्ण ढकालको वैवाहिक सम्बन्धमा पूर्णबिराम

गायक रामकृष्ण ढकालले गएका माया प्रेमका यस्ता दर्जनौँ गीतले धेरैको जीवनमा मेला खाए होलान् । उनका मर्मस्पर्शी गीतहरु अहिले पनि उत्तिकै घन्किने गरेका छन् । उनै ढकालका धेरै गीतमध्ये यो गीत उनको आफ्नै जीवनमा पनि केही हदसम्म मेल खान पुगेको छ । 

 माथि गीतमा भनिएजस्तै उनको श्रीमती निलम शाहले अन्तै माया साटेकी भने होइनन् तर रामकृष्णसँग सँगै जिउने सँगै मर्ने बचन र कसम भने उनले तोडेकी छिन् । बुधबार ढकाल दम्पत्तिको सम्बन्धबिच्छेदसँगै सबै बाचा र कसम तोडिएको हो । 

अर्थात ढकालपत्नी निलमको निवेदनको आधारमा बुधबार जिल्ला अदालत काठमाडौँमा उनीहरुको सम्बन्धविच्छेदको मिलापत्र भएको छ।  जिल्ला अदालत काठमाडौँका न्यायाधीश विदूर कोइरालाको इजलाशमा सम्बन्धविच्छेदमा मिलापत्र भएको अदालतका श्रेस्तेदार आनन्द श्रेष्ठले बताए । 

अदालतका अनुसार निलमले अंश नलिने गरी मिलापत्र भएको हो । यस्तै रामकृष्ण र निलमको एक छोरी रानीको रेखदेख भने दुबैले मिलेर गर्नेछन् । तत्काल भने रानी निलमसँगै रहनेछिन् । 

१७ वर्षपछि सम्बन्धमा पूर्णविराम !
४५ वर्षीय ढकाल निलमसँगको १७ वर्षे सहयात्रापछि एक्लो जीवन जिउने अवस्थामा पुगेका छन् । उनले निलमसँग १७ वर्षअघि अर्थात २०५९ सालमा प्रेम बिबाह गरेका थिए । कार्यक्रमकै दौरानमा निलमसँग पटकपटकको भेटमा प्रेम बसेपछि उनीहरुले विवाह गर्ने निर्णय गरेका थिए । 

कतिपयले यो जोडीलाई उदाहरणीय जोडीको रुपमा लिँदै आएकोमा हाल एकाएक सम्बन्धबिच्छेद हुनुलाई आश्चर्यको रुपमा समेत हेरिएको छ । विगतमा विभिन्न कलाकारको पारिवारिक कहल मिडियासम्म आइपुग्ने गरेको उदाहरण भएपनि ढकालको भने बाहिरिएको थिएन । यस्तै विभिन्न औपचारिक समारोहमा पनि उनले छोरी र निलमको निकै तारिफ गर्ने गर्थे । 

को हुन् ढकाल ?
२०३१ साल साउनमा बारामा जन्मिएका ढकाल नेपालको आधुनिक संगीतका चर्चित नाम हो । विभिन्न रियालिटी सोका जजका रुपमा समेत प्रस्तुत हुने गरेका उनले आधुनिक, पप र फिल्मका सयौ गीतमा स्वर भरेका छन् ।

कतिपयले उनलाई नारायण गोपालपछिका सफल गायकका रुपमा पनि लिन्छन् । बाल्यकालदेखि नै नारायण गोपालका गीतहरु गाएर दर्शक स्रोतका मन जितेका उनी औपचारिक रुपमा भने २०४५ सालबाट संगीत क्षेत्रमा होमिएका थिए । हाम्रो सुन्दर संसार बोलको गीत उनले २०४५ सालमा १४ वर्षकै उमेरमा रकर्ड गराएका थिए । त्यससता उनलाई सांगितिक क्षेत्रमा पछाडि फर्किन परेको छैन । 

ढकालको आशिर्वाद, आशिष, आसा, आरोह, आगमन, मेरोसाथी लगायतका दर्जनौ एल्बम बाहिर आएका छन् भने तीमध्ये अधिकांश हिट छन् । उनी आशिर्वाद नामक फिल्मका नायक समेत हुन् भने थुप्रै म्युनिक भिडियोमा समेत देखिएका छन् ।