बन्गाड कुपिण्डे नगरपालिकामा हेलिप्याड निर्माण

दुर्गा बिसी,
सल्यान ६ पौष ।
सल्यानमा हेलिप्याड निर्माण गरिएको छ । जिल्लाको बन्गाड कुपिण्डे नगरपालिका वडा नम्बर १ मा हेलिप्याड निर्माण गरिएको हो । बनगाड कुपिण्डे नगरपालिकाको आर्थिक सहयोगमा नेपाली सेनाले उक्त हेलिप्याड निर्माणकार्य सम्पन्न गरेको छ ।

आकस्मिक बिरामी र दुर्घटनाका घाइतेको तत्काल उद्धार तथा विपद् व्यवस्थापनका लागि नगरमा हेलिप्याड निर्माण गरिएको बनगाड कुपिण्डे नगरपालिकाका प्रमुख गोविन्द कुमार पुनले जानकारी दिनुभयो । यस्तै नगरले अर्को हेलिप्याड निर्माण गर्ने तयारी समेत गरेको छ ।

सवुज गण सिमखर्क, सल्लिवेश क्याम्पको श्रमदान र बनगाड कुपिण्डे नगरपालिकाको करिव वजेट १० लाख रुपैँया खर्च गरेर निर्माण गरिएको हो । सरकारले दुर्गम क्षेत्रका गर्भवती, सुत्केरी, नवजात शिशुको उपचारका साथै दुर्घटनाका गम्भीर घाइतेको सहज उपचारका लागि ‘एयर एम्बुलेन्स’ शुरू गरेपछि हेलिप्याड बनाउन थालिएको हो । हेलिप्याडले आन्तरिक तथा बाह्य पर्यटकको आवतजावतसमेत सहज बनाउने विश्वास लिइएको छ ।