त्रिवेणी गाउँपालिकामा कोभिड १९ अस्थायी अस्पताल तथा आइसोलेशन सञ्चालन

सल्यानको त्रिबेणी गाउँपालिकामा निर्मित कोभिड अस्थायी अस्पतालको आज उद्घाटन गरिएको छ । त्रिबेणी स्वास्थ्य केन्द्र नजिकै स्थापित कोभिड–१९ अस्पताल पाँच शैयाको बनाइएको हो । अस्पतालमा एक जनस्वास्थ्य अधिकृत, दुई स्टाफ नर्स र एक कार्यालय सहयोगी रहने गाउँपालिका स्वास्थ्य शाखाका संयोजक प्रभात कुमार श्रेष्ठले जानकारी दिनुभयो ।

गाउँपालिका अध्यक्ष मान बहादुर डांगीले अस्पताल उद्घाटन गर्दै पालिकाले स्वास्थ्य क्षेत्रलाई उच्च प्राथमिकतामा राखी काम गरिरहेको जानकारी दिनुभयो । गाउँपालिका प्रमुख प्रशासकिय अधिकृत बसुन्धरा पुनले सबैको सहयोगमा गाउँपालिकाले कोभिड संक्रमण रोकथाम गर्न क्वारेन्टिन, आइसोलेसन केन्द्र हुँदै अस्थायी कोभिड अस्पताल स्थापना गर्न सफल भएको बताउँदै कुनै बिरामीलाई औषधीपचार गर्न बाहिर जानु नपर्ने किसिमले गाउँपालिकाले काम गरिरहेको बताउनुभयो ।