घरमै पुगेर सुत्केरीलाई स्वास्थ्य सेवा दिदै त्रिबेणी गाउँपालिका

असोज १२ सल्यान,

सल्यानको त्रिबेणी गाउँपालिकाले जिल्लामै पहिलोपटक सुत्केरी घरभेट कार्यक्रम सुरु गरेको छ । मातृशिशु मृत्युदर कम गर्न सुत्केरी महिलाको घरमै पुगेर सेवा दिन थालेको छ । नवजात शिशु र आमाको स्वास्थ्य अवस्थालाई मध्यनजर गर्दै सुत्केरी महिलाको घरमै पुगेर उनीहरुको स्वास्थ्य अवस्था जाँचबुझ गर्न गाउँपालिका लागि परेको हो । जस अन्तर्गत गाउँपालिका भित्रका ६ वटा वडाका महिलाहरुले सेवा लिईरहेका छन् ।

भुगोलको हिसाबले पिछडिएको सल्यान जिल्लाका महिलाले सुत्केरी भएको ३ दिन र ७ दिनमा जाँच गराउन स्वास्थ्य चौकी जानुपर्ने बाध्यता छ । त्यसमा पनि कोरोना महामारीका बेला सुत्केरी महिला र शिशुमा संक्रमणको झनै जोखिम छ । यस्तो अवस्थामा कतिपय सुत्केरी महिला संक्रमणको डरले अस्पताल नै नगई बस्ने गरेका छन । तर सल्यानको त्रिवेणी गाउँपालिकाले सुत्केरी महिलाहरुको स्वास्थ्यलाई ध्यानमा राख्दै घरघरमा पुगि स्वास्थ्य सेवा दिन थालेको छ । संक्रमणकै बेला अस्पताल जानुपर्ने बाध्यतालाई अन्त्य गर्दै गाउँपालिकाले घरमै पुगेर सुत्केरी जाँच सेवा दिन थालेको स्वास्थ्य शाखा प्रमुख प्रभात कुमार श्रेष्ठले जानकारी दिनुभयो ।

स्वास्थ्यकर्मीसंगै महिला स्वास्थ्य स्वयंमसेविका घरमै आएर स्वास्थ्य जाँच गर्दा यहाँका सुत्केरी महिलाहरु खुशी बनेका छन ।

गाउँपालिकाले घरमै गएर सुत्केरी महिलाको स्वास्थ्य जाँच गर्न थालेदेखि यहाँका महिलामा स्वास्थ्य अवस्थाप्रतिको डर, त्रास पनि कम भएको छ त्रिबेणी ४ फलाबाङकी शुसिला रोका बताउछिन । महिलाहरु स्वास्थ्य भएपछि त्यसले मातृ तथा शिशु मृत्युदर घटाउने गाउँपालिको विश्वास छ । गुणस्तरिय स्वास्थ्य सेवा प्रदान उदेश्यले सुत्केरी महिलाको घरमै पुगि स्वास्थ्य सेवा दिने कार्यक्रम संचालन गरिएको त्रिवेणी गाउँपालिका अध्यक्ष मान बहादुर डांगीले बताउनु भयो ।
स्वास्थ्य सेवा विशेषगरी शहर र काठमाडौं केन्द्रीत रहँदा दुर्गमका महिलाहरु प्रशव बेदना सहदा सहदै उपचार नपाएर ज्यान गुमाइरहेको अवस्थामा यस्ता कार्यक्रम बढी प्रभावकारी देखिएका छन् ।